Utkatasana Information in Marathi | उत्कटासन मराठी माहिती | Chair Pose

उत्कटासन 

या आसनाचा नियमित सराव केल्यास आपल्या मांड्यांचे व पोटऱ्यांचे स्नायू मजबूत बनतात. तसेच या आसनाचा नियमित सराव आपला उत्साह व जोम वाढविण्यास मदत करतो. हे आसन करताना आपल्या शरीराचा आकृतिबंध आपण एखाद्या खुर्चीमध्ये बसतो त्या प्रमाणे तयार होतो. त्यामुळे या आसनाला इंग्रजी मध्ये चेअर पोझ (Chair Pose) असे म्हणतात. या आसनाची कृती व फायदे या बद्दल सविस्तर मराठी माहिती आपण खाली जाणून घेऊयात. (Utkatasana Information in Marath)

Image source: https://pixahive.com/photo/utkatasana-chair-pose/

कृती:

• सर्वप्रथम आपल्या योग करण्याच्या आसनावर, आपल्या दोन्ही पायांमध्ये काही अंतर ठेऊन सरळ उभे राहा.(साधारणतः ७ ते ९ इंच एवढे अंतर राहूद्या ) 
• या नंतर आपले दोन्ही हात समोर लांबवून आपल्या खांद्याला समांतर राहतील असे राहू द्या. 
• आपले तळहात जमिनीकडे असतील याची काळजी घ्या. वरील आकृतीत दाखविल्या प्रमाणे. 
• आता आपण एखाद्या खुर्चीमध्ये बसताना जसे वाकतो तसे वाका. 
• असे करताना आपले नितंब मागच्या बाजूला जाईल तसेच आपले गुडघे हे पायांच्या तळव्याच्या पुढे जाणार नाहीत याची काळजी घ्या. 
• हि कृती करत असताना आपला श्वासोश्वास निमित्त चालू राहू द्या. 
• हे आसन करताना आपल्या मांड्या आपल्या पोटऱ्यांना स्पर्श करणार नाहीत याची दक्षता घ्या. 
• या स्थितीत १० ते १५ सेकंद राहिल्या नंतर परत आपल्या पूर्व स्थितीत या. 
• या आसनाची किमान २ ते ३ वेळा पुनरावृत्ती करा. 

फायदे: 

1. या आसनाच्या सरावामुळे आपल्या मांड्या, पोटऱ्या व घोटे मजबूत बनतात. 
2. मांड्यांच्या व पोटर्यांच्या स्नायूंना भरपूर व्यायाम मिळून ते मजबूत आणि प्रमाणबद्ध बनतात. 
3. पाठीच्या आणि कमरेच्या भागावर ताण पडून तेथील स्नायू सुद्धा मजबूत बनतात. 
4. या आसनाच्या नियमित सरावामुळे पोट सुटत नाही. 
5. हे आसन करताना शारीरिक तोल सांभाळावा लागतो म्हणून याला तोलासन असे सुद्धा म्हणतात, या आसनाच्या सरावामुळे मन शांत होते, स्थिरावते. 
6. या आसनाच्या नियमित सरावामुळे शरीर हलके होते व आपला उत्साह वाढतो. 

महत्वाची सूचना:

 गुडघ्यांचा, कमरेचा किंवा घोट्यांचा काही त्रास असल्यास तसेच पायांना कोणतिही दुखापत असल्यास हे आसन करू नये. 

कंबरदुखीचा त्रास असल्यास हे आसन योग शिक्षकाच्या योग्य मार्गदर्शनाखालीच करावे.