जांभूळ खाण्याचे फायदे (Indian Blackberry)

जांभूळ 

आंब्याचा मौसम संपल्या नंतर मिळणारे आंबट, तुरट, गोड अशी समीश्र चव असलेले एक गावरान फळ म्हणजेच जांभूळ. या फळाला इंग्रजी मध्ये Java plum किंवा Indian blackberry असे म्हणतात. साधारण मे आणि जून या दोन महिन्यामध्ये हे फळ आपल्याला खाण्यासाठी उपलब्ध असते. मधुमेह या आजारासाठी गुणकारी औषध म्हणजेच जांभूळ. या रोग्यांना जांभळाच्या बियांचे चूर्ण औषध स्वरूपात दिले जाते. तसेच उच्च रक्तचाप, हृदयविकार, पोटाचे विकार या सारख्या अनेक दुर्धर रोगांवर जांभूळ लाभदायक आहे. वर्षातून फक्त दोनच महिने मिळणाऱ्या या फळाचे अनेक असे गुणकारी फायदे आहेत. पुढे आपण जांभूळ खाण्याचे सविस्तर फायदे जाणून घेउयात. ( Benefits of Indian Blackberry)

pic credit: Image by Bishnu Sarangi from Pixabay 

मधुमेह नियंत्रित होतो: जांभळामध्ये अँटी डायबेटिक गुणधर्म आहेत म्हणून ज्या लोकांना मधुमेह आहे त्यांनी जांभूळ नक्कीच खावे कारण त्यांच्यासाठी जांभूळ खाणे हे मधुमेहासाठी औषधी घेण्यासारखेच आहे. मधुमेहाच्या उपचारासाठी जांभळांच्या बियांची पाऊडर सुद्धा वापरली जाते. हि पॉवडर दिवसातून दोनवेळा दुधातून किंवा पाण्यातून घेतली जाते. त्यामुळे जांभळे खाल्यानंतर त्याच्या बिया फेकून न देता त्या सांभाळून ठेवा. 

रक्तशुद्धी होते: जांभळामध्ये लोह भरपूर प्रमाणात त्यामुळे त्याच्या सेवनामुळे आपले रक्त शुद्ध होते तसेच शरीरातील रक्ताचे प्रमाण वाढण्यास मदत होते. तसेच रक्त दाबाचा त्रास देखील कमी होतो. 

शरीरातील हानिकारक पदार्थ बाहेर टाकण्यास मदत करते: जांभळाच्या सेवनामुळे शरीराचे डिटॉक्सिफिकेशन होऊन शरीरातील हानिकारक पदार्थ बाहेर टाकल्या जातात यामुळे आपली रोगप्रतिकारक(I mmunity ) शक्ती वाढते. 

पोटाचे विकार दूर होतात: जांभळाच्या सेवनाने आपल्या पचनसंस्थेचे कार्य सुधारते. जांभळाच्या बियांचा अर्क पोटातील अल्सर किंवा पोटात झालेले इन्फेक्शन दूर करण्यासाठी दिले जाते. 

गर्भावस्थेत बाळाची चांगली वाढ होण्यासाठी:  जांभळामध्ये कॅल्शियम, लोह तसेच जीवनसत्व ई आणि क भरपूर प्रमाणात असते. त्यामुळे गर्भावस्थेत जांभळे खाल्याने बाळाची वाढ चांगली होते. 

मूळव्याधीचा त्रास कमी होतो:  मूळव्याधीच्या च्या रुग्णांनी जेवणानंतर एक वाटीभर जांभळे खावीत तसेच जांभळाचे शरबत सुद्धा प्यावे त्यामुळे मुळव्याधीतून होणार रक्तस्त्राव थांबतो तसेच पोट लवकर साफ होते. 

दात आणि हिरड्यांसाठी उपयोगी: जांभळाच्या बियांची पावडर दात आणि हिरड्यांसाठी फार उपयोगी आहे. जांभळाच्या बियांची बारीक पावडर करून त्याने दात आणि हिरड्या स्वछ केल्यास दात किडणे, हिरड्यातून रक्त येणे, दुर्गंधी येणे असे अनेक त्रास नाहीसे होतात. 

टीप: जांभळाच्या बियांचा किंवा पावडर चा औषधी म्हणून उपयोग करण्याआधी तज्ञ डॉक्टरांचा सल्ला नक्की घ्यावा.