कटि चक्रासन | Kati-chakrasana | कमरेवरील चरबी कमी होते.

कटि चक्रासन

कटी चक्रासन(kati-chakrasana) हे आसन करण्यासाठी अगदी सहज आणि सोपे आहे. या आसनाची शब्द फोड करायची झाल्यास कटी म्हणजे कंबर आणि चक्रासन म्हणजेच चाकाप्रमाणे गोल फिरवणे. या आसनाच्या नित्य सरावामुळे कमरेवरील चरबी कमी होते तसेच पाठीचा मणका,  पोट, मानेसंबंधी असलेल्या तक्रारी दूर होतात. बैठे काम करणाऱ्यांसाठी हे आसन अत्यंत उपयोगी आहे. मागे आपण जमिनीवर झोपून करण्यात येणाऱ्या कटी आसना बद्दल माहिती जाणून घेतली. आता आपण कटी चक्रासनाची कृती व फायदे या बद्दल मराठी मध्ये माहिती जाणून घेऊयात. हे आसन दोन्ही पायावर उभे राहून करण्यात येणाऱ्या आसन प्रकारातील एक आसन आहे. 

कृती:

• आपल्या आसनावर उभे राहा. दोन्ही पायात कमीत कमी एक फूट एवढे अंतर असू द्या. 
• आपले शरीर संपूर्ण सैल सोडा. 
• ज्या प्रमाणे आपण कवायत करताना दोनी हात समोर आणतो तसे दोन्ही हात सरळ समोर आना. 
• समोर आणलेल्या हातांचे तळवे एकमेकांकडे केलेले असावे. समोर आणलेले दोन्ही हात हे खांद्यांना समांतर असतील अशी काळजी घ्या. 
• दोन्ही हात छातीसमोर उचलताना खोल श्वास घ्या, आता हळू हळू उजवीकडे वळा. 
• वळताना हळूहळू श्वास बाहेर सोडा. 
• या स्थितीत उजव्या खांद्यावरून जेव्हडे मागे बघता येईल तेवढे बघण्याचा प्रयत्न करा. 
• आता पूर्व स्थितीत येताना हळू हळू श्वास घ्या. 
• आता हीच कृती डाव्या बाजूने करावी. 
• चार ते पाच वेळा हि कृती दोन्ही बाजूला करून झाल्या नंतर श्वास सोडत दोन्ही हात खाली आणावे. 
• हे आसन करताना कमरेच्या भागाला चांगला पीळ बसेल. 

 फायदे: 

1. या आसनाच्या सरावामुळे कमरेला  व पाठीच्या मणक्याला भरपूर व्यायाम मिळतो त्यामुळे त्यात लवचिकता येते व त्यांची कार्यक्षमता वाढते. 
2. या आसनाच्या सरावामुळे पोटावरी चरबी कमी होण्यास मदत होते. 
3. पचनशक्ती सुधारण्यास मदत होते. 
4. हाताच्या व पायांच्या स्नायूंना भरपूर व्यायाम मिळतो. 
5. मान व खांद्याच्या स्नाययूंमधे येणारा ताण या आसनाच्या सरावाने कमी होतो. 

टीप : पाठीचा त्रास, हर्निया, पाठीच्या मणक्याचा त्रास, स्लिपडिस्क चा त्रास असलेल्यांनी तसेच गरोदर महिलांनी हे आसन करू नये.