बकासन - आत्मविश्वास वाढण्यास मदत होते | Bakasana

बकासन 

 हे आसन करण्यासाठी थोडे अवघड असले तरी रोजच्या नियमित सरावाने या आसनाची सहज साधना करता येईल. बकसनाच्या नियमित सरावामुळे आपल्याला सर्वांगीण फायदे मिळतात. हे आसन करताना आपल्या शरीराचा संपूर्ण भार आपल्याला आपल्या दोन्ही हातावर तोलून धरावा लागतो त्यामुळे हे आसन शांत चित्ताने करावे जेणेकरून आपण आपला तोल जाऊन पडणार नाही. या आसनाच्या सरावामुळे छातीचे व पोटाचे स्नायू मजबूत बनतात तसेच आपले मन स्थिर होऊन आपला आत्मविश्वास वाढण्यास मदत होते. खाली आपण बकसनाची कृती आणि फायदे या बद्दल संपूर्ण माहिती मराठी मध्ये जाणून घेऊयात.(Bakasana information in marathi) 

image क्रेडिट- https://pixahive.com/photo/crow-pose-bakasana/

कृती: 

• आपल्या दोन्ही हातांचे पंजे आपल्या खांद्याला समांतर असे आसनावर ठेवा. 
• आता आपल्या दोन्ही हातांच्या दंडावर आपल्या दोन्ही पायांचे गुडघे टेकवा. 
• आता आकृतीत दाखवल्या प्रमाणे आपल्या संपूर्ण शरीर आपल्या दोन्ही हातावर तोलण्याचा प्रयत्न करा. 
• हि कृती करताना आपले हात कोपऱ्यातून वाकणार नाहीत याची काळजी घ्या. 
• तसेच आपली मान थोडी वरच्या दिशेला असू द्या. 
• आपले पाय हवेत असताना श्वास रोखून धरा. 
• हे आसन सोडताना हळू हळू श्वास सोडावा व त्याच सोबत आपले पाय जमिनीवर टेकवावे. 
• सुरुवातीला काही दिवस हे आसन थोडावेळ करावे . त्यानंतर हळू हळू वेळ वाढवत नेवून हे आसन पंधरा मिनिटापर्यंत करता येऊ शकते. तेव्हा मात्र श्वास रोखून धरण्याची गरज नाही. 

फायदे:

1. या आसनाच्या सरावामुळे मनाची चंचलता कमी होते त्यामुळे आपले मन शांत व स्थिर होते. 
2. त्यामुळे आपला आत्मविश्वास वाढायला लागतो. 
3. या आसनाच्या सरावामुळे संपूर्ण शरीराला भरपूर व्यायाम मिळतो. 
4. या आसनाच्या सरावामुळे आपल्या मनगटाची व हातांची ताकत वाढते. 
5. या आसनाच्या नियमित सरावामुळे छातीचे व पोटाचे स्नायू मजबूत बनतात. 
6. तसेच पाचनतंत्र, श्वसनतंत्र व ज्ञानतंत्र हि कार्यक्षम बनतात. 

टीप: हे आसन करताना आपण आपला तोल जाऊन पडण्याची दाट शक्यता आहे, त्यामुळे सुरुवातीला हे आसन योग्य मार्गदर्शनाखालीच करावे.