वृक्षासन- एकाग्रता वाढवण्यासाठी उपाय | Vrikshasana

वृक्षासन

    पायावर उभे राहून करण्यात येणाऱ्या आसन प्रकारातील हे आसन आहे, हे आसन करण्यास अत्यंत सोपे असून या आसनात शरीराचा आकार वृक्षाप्रमाणे म्हणजेच झाडाप्रमाणे दिसत असल्यामुळे या आसनाला वृक्षासन(Vrikshasana) असे म्हणतात. या आसनालाच इंग्रजी मध्ये ट्री पोझ (tree pose) असे म्हणातात. या असणामध्ये आपल्या संपूर्ण शरीराचा भार एका पायावर तोलल्या जातो तसेच हे आसन करताना आपले संपूर्ण शरीर ताणले जाते व आपल्या हातापायांच्या साध्यांना भरपूर व्यायाम मिळतो. स्ट्रेचिंग करण्यासाठी वृक्षासन हा एक सर्वोत्तम पर्याय आहे. या आसनामुळे आपले हात, पाय, मांड्या व कंबर यांचा भरपूर व्यायाम होतो. हे आसन एकाग्रता वाढविण्यासाठी खूप मदतगार आहे. हे आसन करताना शरीराचा तोल सांभाळावा लागतो, असे करताना डोक्यातील इतर विचार आपोआपच बाजूला सारल्या जातात त्यामुळे मानसिक स्थैर्य साधल्या जाते. याचाच उपयोग स्मरणशक्ती वाढण्या साठी होतो. चला तर मग वृक्षासनाची कृती व त्यापासून मिळणारे संपूर्ण फायदे या बद्दल मराठी मध्ये जाणून घेऊयात. (Vrikshasana steps and benefits information in marathi) 

वृक्षासन

pic Credit-https://pixahive.com/photo/yoga-by-female-in-park/

कृती:

• प्रथम उजव्या पायावर उभे राहा आणि डाव पाय गुडघ्यात दुमडवून पायाची टाच उजव्या जांघेत ठेवा.
• हि क्रिया करताना जर एका पायावर शरीराचा तोल सांभाळणे अवघड जात असेल तर भिंतीचा आधार घ्या.
• दोन्ही तळहात जुळवून आपल्या छातीपाशी आणा. 
• आता आकृतीत दाखविल्याप्रमाणे दोन्ही तळहात जुळवून  छातीसमोरून डोक्यावर लांबवा.
• हात वर नेतांना दीर्घ श्वास घ्या. 
• दोन्ही हात वर ताठ ठेवा. हात कोपरांत वाकू देऊ नका. पाठीचा कणा ताठ ठेवा. 
• नजर सरळ समोर एका ठिकाणी स्थिर करा. 
• आता हळू हळू दीर्घ श्वास घेणे आणि सोडणे चालू राहू द्या. साधारणतः दहा सेकंदापर्यंत या स्तिथीत राहा.
• आता हळू हळू श्वास सोडत दोन्ही हात खाली आना, व पाय सुद्धा खाली घ्या. 
• काही वेळच्या विश्रांती नंतर हीच क्रिया दुसऱ्या पायाने परत करा. 
• हे आसन आपल्याला वेळ मिळेल तसे दिवसातून चार ते पाच वेळा करता येऊ शकते. 

फायदे:

1. हे आसन एकाग्रता वाढविण्यासाठी खूप मदतगार आहे. 
2. या आसनाच्या नियमित सरावाने पायाची बोटे, गुढघे, हाताचे कोपरे वैगेरे अवयवांमधील नाड्यांमध्ये रक्त पुरवठा सुरळीत  होतो. 
3. या आसनात आपले हात, पाय, कंबर, पाठीचा कणा, छाती या सर्वांवर ताण पडून त्यांचा भरपूर व्यायाम होतो. 
4. या आसनाच्या नित्य सरावामुळे पाय लवचिक बनतात. 
5. छाती भरदार बनते व शरीराला तोल येतो. 
6. या आसनामुळे शरीराच्या प्रत्येक सांध्याला पुरेसा व्यायाम मिळतो.
7. या आसनाच्या सरावाने सायटिका सारखा त्रास बरा होण्यास मदत मिळते. 

टीप: ज्यांना उच्च रक्तदाबाचा त्रास आहे त्यांनी हे आसन करू नये.