पूर्ण शलभासन - मधुमेह नियंत्रीत करता येतो | Purna Shalbhasana

पूर्ण शलभासन

आजकालच्या धावपळीच्या जीवनात आपले आपल्या आरोग्याकडे लक्ष देणे होत नाही. आणि त्यातच चुकीच्या खानपान पद्धतीमुळे आपले शरीर विविध आजारांचे शिकार बनते. 'मधुमेह' हा असा आजार आहे कि तो एकदा झाला कि आपल्या प्रत्येक गोष्टीवर बंधन आणतो. आणि तो आजार एकदा जडला कि त्याला नियंत्रणात आणणे खूप अवघड जाते. म्हणून तो आजार होऊच नये आणि झाला असेल तर त्यावर नियंत्रण मिळवण्यासाठीचा एक उत्तम उपाय म्हणजे पूर्ण शलभासन(Purna-Shalbhasana). तसेच मासिक पाळी च्या वेळी स्त्रियांना होणारा त्रास सुद्धा या आसनाच्या सरावा नंतर कमी होतो. अर्ध शालभासनात आपण एक पाय वर उचलतो आणि या आसनामध्ये आपले दोन्ही पाय वर उचलेले असतात म्हणून याला पूर्ण शलभासन असे म्हणतात. या आसनाची संपूर्ण कृती व त्यापासून आपल्याला होणारे फायदे या बद्दल संपूर्ण माहिती मराठी मध्ये आपण येथे बघणार आहोत. (Purna Shalbhasana information in marathi)

pic credit:- Shalbhasana

कृती १:

• प्रथम जमिनीवर पालथे म्हणजेच पोटावर झोपा.
• दोन्ही हात आपल्या शरीराला समांतर ठेवा.
•  हाताची बोटे वळवून घ्या.
• आता श्वास आत भरा आणि रोखून धारा.
• शरीर ताठ करून दोन्ही पाय हळू हळू शक्य होईल तितक्या वर उचला.
• पाय गुडघ्यात वाकू देऊ नका.
• आता पायाचे चवडे ताना आणि मांड्या आणि ओटीपोटाचा भाग वर उचला.
• साधारण तीस सेकंदा पर्यंत या आसन स्थितीत राहा.
• या आसनस्थितीत असे पर्यंत श्वास रोखून धरा.
• पाय हळू हळू खाली आणा आणि रोखलेला श्वास हळू हळू सोडा. 

कृती २: 

• शालभासनाच्या पहिल्या कृती प्रमाणेच आसनस्थिती करा.
• आता आपले दोन्ही हात छातीजवळ आणा व त्यांचे पंजे जमिनीवर टेकवा.
• शलभासनाच्या पहिल्या कृती मध्ये आपण जसे पाय उचले होते तीच कृती आता करायची आहे.
• पाय पूर्ण वर उचलल्या गेल्यावर आता डोके वर उचला.
• पहिल्या कृतीत आपले फक्त पाय वर उचलल्या गेले होते. दुसऱ्या कृती आपले दोन्ही पाय आणि डोके वर उचलायचे आहेत. 

फायदे: 

1. या आसनामुळे फुफ्फुसाचे सर्व विकार दूर होतात. 
2. मासिक पाळीच्या वेळी  स्रीयांना होणारा त्रास या आसनाच्या नियमित सरावाने दूर होतो. 
3. या आसनामुळे पोटातील स्नायूंवर दाब पडल्याने पोट, मांड्या, आणि पायांचे स्नायू मजबूत बनतात. 
4. या आसनाच्या नियमित सरावामुळे जठर, पित्ताशय, प्लिहा आणि मूत्राशय हे पोटाचे अवयव कार्यक्षम व सुदृढ बनतात.
5. या आसनामुळे वातजन्य, पित्तजन्य आणि कफजन्य गुल्मरोग(पाणथरी) बरे होतात. 
6. या आसनामुळे आतड्याचे विकारही दूर होतात. 
7. या आसनामुळे पायावरील  सूज कमी होते. 
8. या आसनामुळे कंठग्रंथी कार्यक्षम बनतात. 
9. या आसनाच्या सरावामुळे मुतखडा, मधुमेह, मूत्रावरोध या सारखे रोग बरे होतात.